Зәй районы командасы «Аулак өй – баттл» ярымфиналда

20 июля 2022

23 июльдә Болгарда «Ага Базар» фестивалендә «Аулак өй – баттл» Республикакүләм финал ярышлары була. 20 июльдә, Татарстан язучылар берлегенең Тукай клубында ярымфинал үтте. Ярымфиналда Зәй районы командасы да катнашты.

Аулак өй – баттл» проекты Бөтендөнья татар конгрессы, ТРның Мәдәният министрлыгы, ТР Мәгариф һәм фән министрлыгы, ТР язучылар берлеге, «Татмедиа» ярдәмендә оештырыла.
Бүген, 20 июльдә, ярымфиналда финалга чыккан барлык командалар да катнашып, үзара көч сынашты.

Әлеге чараны «Россия халыкларының халык сәнгате һәм матди булмаган мәдәни мирас елы» уңаеннан югары уку йортларында, ТР районнары мәктәпләрендә һәм Республикабызның төрле районнарында эшләп килүче иҗат берләшмәләрендә, иҗтимагый үзәкләрдә узды һәм проект Республикакүләм дәрәҗәгә күтәрелде.

Проектның төп максаты – укучы балаларны, яшь буынны татар халкының гореф-гадәтләре, милли йолалары, татар халык уеннары белән таныштыру, актив иҗат иткән төрле буын каләм ияләре хакында мәгълүмат бирү, иҗатка омтылышы булган балаларны барлау, алар өчен иҗат лабораториясе булдырып, остаз каләм ияләреннән иҗатларына бәя алу.